[ 脊醫 ] 呢個醫生態度好差，好唔專業，好嬲！

本人有頸痛問題，都痛左一段時間，又有手痺的問題，所以懷疑自己有椎間盤突出症，咁就上網睇有邊位脊醫可以幫到我啦。見到汪醫生有咁多好評同推介一定冇問題啦，點知去到真係覺得好災難！

咁我一早已經預約左，我係預約時間早5分鐘去到，開頭入到去都覺得唔錯，姑娘既態度都幾nice，完成左正常既登記程序之後，但都等左一段時間。地方好細，都幾逼下，得兩個位俾病人坐，但我目測診所好多人，惟有企係到等。

到入到去見醫生，我講緊我有咩唔舒服既時候，佢係到嘆咖啡，我已經覺得呢個醫生態度好差，我講完我既問題之後，醫生就叫我趴係床到做檢查，但間房得我同醫生兩個人，並沒有女姑娘在場，作為一個女病人，雖然要相信醫生，但感覺都十分差勁！

當我趴了上床後，醫生就按了我的脊骨兩三下，問了幾句痛唔痛之際，有位姑娘就入左房同醫生講幾句，醫生就同我講了一句「唔好意思，等等我」就出左醫生房，我就在醫生房趴著等醫生回來等了10分鐘左右，原來佢過了隔離治療房幫其他病人，我明明預約左，睇睇下都會出左去，我覺得佢十分唔尊重病人！入到黎，又唔記得曬我既問題，好似由頭黎過咁，好唔專業，好嬲！

我懷疑自己椎間盤突出症，但冇照任何的MRI或XRAY就開始整脊推正骨，係有咯咯聲既，亦都唔痛，但之後醫生又叫我做一張特別床，汪醫生話係佢獨有，美國發明韓國製造的特別床，然後再做衝擊波，咁就又跟佢指示做啦，但全程做既過程汪醫生都不在場！全程都是姑娘跟進，但做的過程姑娘都好細心問有冇痛，亦有問下我過往的不適，有冇整親過咁，個下我先覺得我真係睇緊醫生！連姑娘都會關心我的情況，而醫生就求其、得過且過咁，咁我搵姑娘就得啦，反正大部份治療都唔係汪家智醫生做！錢就照收，野就唔洗醫生做！

出到黎，醫生問左幾句感覺如何，講左部機係消炎就算，就即刻叫我約覆診時間，其實真係好hard feeling，好彩我出到去，同我做治療個位姑娘會詳細講解返頭先做過既野，做過既治療又俾小冊子我睇下咁，又有叫我飲返多d水，如果唔係我真係唔知我做緊乜野！可能做得一次，冇任何改善，但我都唔會再睇佢啦，搵一個會同我照MRI或者XRAY既醫生先再做治療，佢亂咁黎，都唔知得唔得，真係好擔心自己情況！

另外，佢既大門貼住遲到者要收10%的遲到費，真係好奇怪！仲有，我係做衝擊波的期間聽到出面醫生房好嘈，嘻嘻哈哈咁，醫生的態度又唔同曬，好好又好nice咁，我估應該係熟客仔啦。我真係覺得呢位醫生好有問題！

我本身都唔打算留言嫁，但我見到好多人都話佢好好，但我真係唔覺囉，又冇心機，又唔專業！唔係一視同仁！都唔知係唔係搵打手，我先專登花一段時間打咁大篇！各位，你地睇完再慎重考慮黎唔黎睇佢！真係不知所謂！

请问是那个公司的脊医

請問你後來找了那位醫生呀，醫好了沒有，因我都是有頸椎病問題，現在也尋求好醫德醫生，你有好推薦嗎！

你唔應該搵脊醫,脊醫唔係醫生。你係骨科西照MRi 及x ray再由骨科醫生轉介你去脊醫或物理治療。起香港脊醫同物理治療師都同一範疇,佢地唔可以轉介你照嘢。